CML SAKU MIDUN

NAN MADA NAN BERBAKTI !!

Carito ko ndak lucu doh sanak, tapi mudah-mudahan ado manfaatnyo..

Suatu katiko ambo basobok jo kawan ambo di Banduang, konco arek nan lah puluahan tahun ndak basobok. Kami pun mangecek panjang leba sarato maota ndak bakarunciangan. Singkek carito ambo diajaknyo dek kawan ambo tu karumahnyo, kironyo kawan ambo tu lah sukses, rumahnyo lumayan megah, Oto lah ado, tokonyo pun banyak. Nan mambuek ambo takajuik bukanlah tentang kekayaannyo, tapi katiko ambo mancaliak kawan ambo mambimbiang jo mamapah Abaknyo nan lah tuo ka kamar mandi. Sudah mandi dipakaikannyo pakaian ka Abaknyo, disuok’an nyo makanan ka Abaknyo jo perasaan tulus sarato kasiah sayang, ndak tampak dek ambo wajah tapaso dimuko kawan ambo tu. Takana bana dek ambo katiko ketek kawan ambo ko marasai kanai ariak, kanai berang sarato kanai tangan dek Abaknyo. Maklum katiko ketek kawan ambo ko urangnyo sabana mada, pamaleh, magang jo susah diatur. Babeda bana jo adiak sarato uni jo udanyo nan patuah-patuah jo rajin, hinggo disayang dek Abaknyo. Nah kawan ambo ko jan kan disayang, malah cando anak diri dek Abaknyo surang. Apo pun nan di inginkan dek Adiak, uda jo uni kawan ambo ko pasti dituruik’an dek Abaknyo, sadangkan kalau kawan ambo ko, apo pun nan inyo mintak ndak pernah dituruik’an dek Abaknyo..

Katiko Abaknyo lah lalok, kami pun maota liak..

“Sajak bilo ang bawo Abak ang ka Banduang?” Tanyo ambo..
“Lah 3tahun kawan..” Jawek kawan ambo..
“Baa dek ang bawo?” Tanyo ambo liak..
“Amak den lah maningga, tingga Abak den surang lay, ndak ado nan maurus liau, samantaro liau lah makin tuo jo acok sakik..” Jawek kawan ambo..
“Adiak ang, uni jo uda-uda ang kan lai dikampuang tu, baa ndak nak urang tu sajo nan maurus?” Tanyo ambo..
“Nak urang tu lah sibuk jo urusan sarato keluarganyo masiang-masiang..” Jawek kawan ambo..
“Maaf kawan.. Ko pertanyaan den agak sensitif stek, bukannyo dulu katiko ketek ang marasai dek Abak ang surang, Abak ang dulu kan piliah kasiah, manga kok kini ang amuah maurus Abak ang?” Tanyo ambo..

Dihiruiknyo angok dalam-dalam dek kawan ambo, sudahtu nyo jawek pertanyaan ambo..

“Den picayo bana jo hukum karma kawan, apo pun nan kito lakukan, elok atau buruak pasti babaliak ka kito liak. Katiko ketek den marasai dek Abak den, dibeda-bedakan sarato piliah kasiah ka adiak, uni jo uda den nan rajin-rajin sarato utaknyo santiang-santiang tu, samantaro aden apo bana lah katiko itu, pakak, mada, magang, pamaleh sarato muko pas-pasan.. Jadinyo aden diterlantarkan dek Abak kanduang den surang. Akhianyo apo nan tajadi, Abak den manarimo karmanyo surang. Katiko tuo jo acok sakik-sakik, liau diterlantarkan pulo, tapi nan manterlantarkan liau bukanlah anak nan pernah liau terlantarkan tapi diterlantarkan dek anak-anak nan liau sayang..”

“Tunggu nta kawan den potong stek, kalau baitu baa dek namuah ang marawat Abak ang?” Tanyo ambo..

“Bak kecek den tadi, den picayo jo hukum karma, den rawat Abak den karano aden ndak nio diterlantarkan pulo dek anak-anak den isuak. Logikanyo cando iko.. Apo pun nan den lakukan ka Abak den kini ko pasti dicaliak jo dicontoh dek anak-anak den, jadi aden marawat Abak den ko indak sajo karano keharusan den sebagai anaknyo sajo, bukan kewajiban sajo tapi supayo dicontoh dek anak-anak den, bia isuak kalau den lah tuo, anak-anak den ikhlas pulo marawat den, katiko ketek sajo ndak alang padiahnyo lay diterlantarkan tu, apo lay kalau lah tuo..” Jawek kawan ambo, tanpa sadar tampak dek ambo aia mato kawan ambo tu balinang..

Saku Midun
“H-Z
@CMLsakumidun

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s